Kòrsou ta pone su mes riba mapa na evento internashonal Wealth Latin America and the Caribbean Forum.
Willemstad 1 di novèmber 2021 – Riba 25 i 26 di òktober Curaçao International Financial Center (CIFC) a pone Kòrsou riba mapa, di un forma impreshonante, komo spònser prinsipal di e di ocho edishon di e Private Wealth Latin America and the Caribbean Forum. CIFC ta un partner privá-públiko ku tin komo meta pa promové e sektor di servisio finansiero internashonal di Kòrsou.
E evento prestigioso aki a tuma lugá e aña aki na Miami i tur aña e evento aki ta bon bishitá dor di e asina yama Family Offices, Atministradornan legal di kapital , Fondsmanagers, Registered Investment Advisors i Bankonan privá den region. E oradónan di e programa a tabata konsistí prinsipalmente di lidernan di e sektor finansiero for di Estádos Unídos, Latino Amérika i region di Karibe. E evento ta kompletamente privá i por wòrdu bishitá solamente riba invitashon personal di e komunidat di rikesa privá regional (private wealth community). E aña aki alrededor di 275 persona aki bishitá e evento aki.
Durante e añanan ku a pasa Kòrsou a traha eksepshonalmente duru pa por establesé un sistema finansiero nobo ku ta sólido i konfiabel. Debí na e esfuersonan aki, temporalmente a dediká ménos atenshon na promoshon di nos isla komo un partner fuerte den negosiashon internashonal. E aña aki, sin mas, nos a trese kambio den esaki. Un delegashon di 12 eksperto biniendo for di e sektor di servisionan internashonal, a sa di pone Kòrsou riba mapa komo un hurisdikshon atraktivo pa diferente ophetivo. E delegashon tabata konsistí di kompanianan manera Corpag, Intertrust, HBM Group, TMF, Citco Governance Services, IQEQ, Amicorp, DCSX i tambe Cinex.
Curaçao: The Choice for your International Business and Peace of Mind.
Kòrsou komo e eskoho pa negoshi internashonal i pas mental: esaki tabata e tema riba kua señora Nacha De Jesus, presidente di e hunta di direktiva di Curaçao International Financial Services Association (CIFA), a amplia durante su presentashon, kual a tuma lugá mesora despues di apertura di e konferensia, dilanti un sala yen. El a pone énfasis riba e servisionan finansiero ku Kòrsou ta disponé di dje ku su régimen nobo. Kòrsou ta base di diferente instansianan finansiero prestigioso i ta wòrdu usá konsekutivamente dor di invershonistanan, sosiedatnan, Family Offices, fondonan di invershon i otro negosiantenan for di EU i otro pais den Latino Amérika.
Pronto nos lo por spera un sistema di pèrmit nobo i tambe areglonan fiskal benefisioso, den e esfera di impuesto riba entrada, pa atraé temporary workers, digital nomads, hibernators, startups, scale-ups i overage niche experts. Tambe tin oportunidatnan pa por sostené empresanan internashonal ku mas ekspertisio i supstansia. Esaki ta sumamente importante pa kompanianan i invershonistanan internashonal.
Na Kòrsou nos tin hopi konosementu di e sektor finansiero internashonal. Banda di esaki Kòrsou tin un infrastruktura tékniko i hurídiko sólido meskos ku nos maneho di impuesto, kual ta state of the art. E maneho nobo di impuesto teritorial riba ganashi ta ofresé, den kombinashon ku strukturanan supstansial pa loke ta trata maneho di empresa, stimulashon signifikante pa atraé aktividatnan ekonómiko internashonal, ku eksonerashon riba ganashi di eksterior. Hasi negoshi ku Kòrsou ta nifiká hasi negoshi den un infrastruktura sólido, kumbiniente i atraktivo pa invershonistanan internashonal i otro instansianan finansiero.
Ta evidente ku e delegashon di Kòrsou a logra laga un impreshon hopi positivo atras riba esnan ku a presensiá e evento aki. Ya kaba tabata tin diferente kòmbersashon serio ku konseheronan internashonal i manehadónan di fondo ku a keda impreshoná ku e posibilidatnan finansiero ku Kòrsou tin di ofresé. Den futuro CIFC, den kolaborashon ku otro organisashonnan di interes na Kòrsou, lo sigui hasi su máksimo esfuerso pa promové Kòrsou komo un partner atraktivo den e sektor di servisio finansiero internashonal.
